- طريقة عمل مكرونة بالجمبري بالخطوات
لكل البنات عشاق السي فود والجمبري بشكل خاص النهاردة جايبنلكم طريقة عمل مكرونة بالجمبري وصفة سهلة وبمكونات بسيطة جدا ومش هتاخد منك اي وقت في التحضير
المقادير:
– 1 معلقة كبيرة زيت زيتون.
– ¼ كيلو سجق متقطع شرايح رفيعة.
– ½ بصلة متقطعة مكعبات.
– ½ كوباية كرفس متقطع مكعبات صغيرة.
– 2 كوباية طماطم متقطعة مكعبات صغيرة.
– ½ كيلو مكرونة اقلام او سباجيتي.
– 1 معلقة كبيرة خلطة توابل كاجون عبارة عن “2 معلقة كبيرة ثوم بودر, 2 معلقة كبيرة توابل ايطالية, 2 معلقة كبيرة بابريكا, 2 معلقة كبيرة ملح, 1 معلقة كبيرة فلفل اسود, 1 معلقة كبيرة شطة, 1 معلقة كبيرة زعتر, 1 معلقة كبيرة بصل بودر” اخلطي كل التوابل مع بعض واحتفظي بيهم في برطمان تستخدمي منها في اي اكلات.
– 3 كوبايات شوربة فراخ.
– ½ كيلو جمبري كبير, متقشر ومتنضف.
– ملح – فلفل حسب الرغبة.
– بقدونس طازة للتزيين.
طريقة التحضير:
1- في حلة كبيرة على نار متوسطة ضيفي زيت الزيتون وشرايح السجق والبصل والكرفس, وقلبيهم وسيبيهم مع بعض لمدة من 3 – 4 دقايق تقريبا لحد ما الخضار يدبل.
2- اثناء الوقت ده هاتي الجمبري قشرية ونضفيه كويس شيلي العرق بتاعه من الضهر واغسليه بالمية.طريقة
3- ضيفي على الخضار اللي على النار الطماطم, والمكرونة, والتوابل, والملح والفلفل الاسود, وشوربة الفراخ, قلبي المكونات كلها مع بعض وقللي النار, وغطيهم وسيبيهم على نار هادية لمدة 6 دقايق تقريبا.
4- بعدها قلبيه تاني وسيبي الحلة مكشوفة من غير غطا لمدة 4 دقايق كمان, عشان المكرونة تستوي وتمتص السوائل.
5- دلوقتي ضيفي الجمبري وقلبيه كويس مع باقي المكونات, وغطي الحلة وسيبيها على النار 3 دقايق.
6- شيلي غطا الحلة, وقلبي المكونات مع بعض تقليبة اخيرة, وبعدين ارفعيها من على النار ورشي عليها البقدونس الطازة.